Ахсынньы ый 5 күнүгэр Сургуулук нэһилиэгэр Чена Васильевна уонна Александр Федорович Степановтар дьиэ кэргэннэрин Кооперативтара тыа хаһаайыстыбатын өҥөтүнэн саҥа 50 төбөҕө хороҕор муостаахтарын хорҕойон турар киэҥ — куоҥ уораҕайын аалай кыһыл лиэнтэни кырыйан үөрүүлээх быһыыга майгыга арыллыыта буолла. Ыраахтан — чугастан ыҥырыылаах ыалдьыттар, тыа хаһаайыстыбатынан дьарыктанар кооперативтар мааны ыалдьыт буолан ыалдьыттаатылар, уопут атастастылар. Төрүт дьарык чэчирии сайдарыгар, хороҕор муостаах элбии- тэнийэ турарыгар айыыһыттартан көрдөһөн, сахалыы сиэри-туому тутуһан аал уоту оттон, сири- уоту аһатан алгыһынан арчылаата ытык мааны алгысчыппыт Павел Павлович Алексеев.
